Anthropic компаниясы Nasdaq биржасында IPO өткізу арқылы 90 млрд доллар жинауды жоспарлады

Anthropic жасанды интеллект (ЖИ) стартапы Nasdaq биржасында акцияларын көпшілікке ұсынуға (IPO) дайындалып жатыр. CNBC телеарнасының хабарлауынша, бір акция үшін 70–78 доллар шамасындағы бағамен өтетін бұл IPO аясында ірі технологиялық компаниялар 26 млрд доллар сомасына акциялар сатып алуды жоспарлап отыр.

Инвесторлар қатарында Advanced Micro Devices, Broadcom, Google, Micron, Microsoft, Nvidia және Taiwan Semiconductor Manufacturing Company сияқты гиганттар бар. Ерте инвесторлардың бірі Amazon да стартаптағы қомақты үлесін сақтап қалған. Жалпы орналастыру нәтижесінде Anthropic 90 млрд доллардан астам қаражат тартуды көздейді. Осыған дейін стартаптың қолма-қол ақшасы мен қысқа мерзімді инвестициялары 132 млрд долларды құраған болатын. Ал 2026 жылдың алғашқы тоғыз айында компанияның таза шығыны 104 млрд долларға жеткен.

Ұзақ мерзімді міндеттемелер мен инфрақұрылым

Үлкен тілдік модель (LLM) мен ЖИ шешімдерін дамыту үшін Anthropic инфрақұрылымға орасан зор қаражат жұмсауда. Компания ұсынған проспект мәліметтеріне қарағанда, оның жалпы шығын міндеттемелері 900 млрд доллардан асады. Стартап Amazon компаниясымен он жыл ішінде кемінде 110 млрд доллар жұмсауға келіскен. Сонымен бірге бұлтты есептеу қуаттылықтарын жалға алу үшін басқа серіктестермен 400 млрд долларлық міндеттеме жасалған.

Одан бөлек, стартап деректер орталығы мен чип өндірушілермен 300 млрд долларға келісімшарт отырғызған. Сондай-ақ, Anthropic 2028 жылдан бастап жеткізілетін ЖИ чиптері үшін Google компаниясына 125 млрд пен 150 млрд доллар аралығында қаражат төлеуді жоспарлап отыр.

Серіктестік пен нарықтағы тәуекелдер

IPO қорытындысы бойынша Google компаниясы Anthropic-тің шамамен 13 пайыз үлесіне ие болады. Сонымен қатар, Google стартаптың Terawulf компаниясымен жасасқан 19 млрд долларлық деректер орталығын жалға алу келісіміне де кепілгер ретінде қатысуда.

Сегменттегі ЖИ модельдерін оқыту үшін графикалық процессор (GPU) жетіспеушілігі сақталып отырғандықтан, компаниялар инфрақұрылымды ұзақ мерзімге резервтеуге мәжбүр. Сала сарапшыларының айтуынша, егер инфрақұрылым қуатын бұрыннан бекітіп қоймаса, нарықтан ығысып қалу қаупі жоғары. Anthropic компаниясының бұл қадамы саладағы күрделі кезеңмен және технологиялық компаниялар акцияларының құбылуымен тұспа-тұс келіп отыр.