Украиналық UFORCE стартапы 700 млн доллар инвестиция тартып, бағалануын 6 млрд долларға жеткізді

Украиналық UFORCE қорғаныс технологиялары стартапы кезекті инвестициялық раундта 700 млн доллар қаржы жинап, компанияның бағалануын 6 млрд долларға жеткізді. CNBC хабарлауынша, Series A раундына Valor Equity Partners пен Ұлыбританияның Ұлттық әл-ауқат қоры (National Wealth Fund) жетекшілік етті. Қаржыландыруға сонымен қатар Кремний алқабы, Еуропа және Азия инвесторлары қатысты.

Ұшқышсыз ұшу, теңіз және жер үсті жүйелерін, сондай-ақ оларды үйлестіретін жасанды интеллект (ЖИ) бағдарламалық жасақтамасын әзірлейтін UFORCE наурыз айында 1 млрд доллар бағалаумен 50 млн доллар тартқан болатын. Компанияның бас атқарушы директоры инвесторлардан бұдан да жоғары бағалау ұсыныстары түскенін, бірақ соған қарамастан Valor қорының тәжірибесіне сүйеніп, осы келісімді таңдағанын хабарлады.

Компания жаңа инвестицияны өндіріс көлемін Украинада және оған одақтас елдерде, соның ішінде АҚШ, Еуропа, Азия-Тынық мұхиты аймағы мен Таяу Шығыста кеңейтуге жұмсауды жоспарлап отыр. UFORCE деректеріне сәйкес, олардың NEMESIS дрондары 300 мыңнан астам жауынгерлік ұшу жасаса, MAGURA теңіз дрондары Қара теңізде бірнеше әскери кемені жоюға қатысқан.

НАТО елдеріндегі қорғаныс стартаптарының өсуі

Dealroom және Resilience Media есебіне сүйенсек, қыркүйек айындағы жағдай бойынша НАТО мен оған одақтас елдердің стартаптары 27,1 млрд доллар венчурлік капитал тартқан. Бұл 2025 жылдың толық көрсеткішінен екі есе дерлік көп.

Компания басшысы батыстық дәстүрлі өндірушілермен салыстырғанда украиналық әзірлеушілердің басты артықшылығы майдан даласында бағдарламалық жасақтама мен жүйелерді қолданатын әскери қызметшілерден үздіксіз кері байланыс алу мүмкіндігі екенін атап өтті. Оның болжамынша, алдағы онжылдықта автономды жүйелер адам басқаратын әскери техниканың көбін біртіндеп алмастырады.