Германия ғалымдары адам жасушаларын жасартудың жаңа әдісін ұсынды

Wired басылымының хабарлауынша, Бонн университетінің профессоры Оливер Брюстле бастаған ғалымдар тобы жасушаларды жасартудың жаңа әдісін ұсынды. Олардың бұл зерттеуі Aging Cell ғылыми журналында жарияланды. Мамандар нәрестеден бастап 101 жастағы донорға дейінгі әртүрлі жастағы адамдардың қан жасушаларын пайдаланып, олардың биологиялық сағатын баяу кері бұруды жүзеге асырды.

Ғалымдар бұған дейін де ересек жасушаларды эмбрионалдық бағаналы жасушаларға айналдыра алатын. Алайда мұндай плюрипотентті жасушалар ағзада қатерлі ісіктің түзілуіне әкелуі мүмкін болғандықтан, қартаюға қарсы терапияда қолдануға қауіпті саналатын. Неміс ғалымдары жасушаларды плюрипотентті күйге толық жеткізбей, қауіпсіз аралық кезеңде тоқтату әдісін тапты. Осылайша, екі айдан аз уақыт ішінде негізгі биомаркерлердің көрсеткіші 60 жылға дейін жасарған.

Жасару механизмін зерттеуге арналған жаңа модель

Зерттеу барысында жасушалардың көбейту қабілеті төмендеген кезде де биологиялық жастың кері шегінуі тоқтамаған. Бұл процесс жасушалардың жай ғана бөлінуімен шектелмейтінін көрсетеді. Профессор Оливер Брюстле атап өткендей, бұрын бағаналы жасушаларды алу өте жылдам жүретін және жасару кезеңін егжей-тегжейлі зерттеуге мүмкіндік бермейтін. Ал жаңа әдіс биологиялық сағатты баяу бұру арқылы процестің әр кезеңін бақылауға жағдай жасайды.

Сондай-ақ зерттеушілер қан жасушаларын нейрондар өндіретін жасуша түрлеріне де бағыттап көрген. Бұл медицинадағы регенеративті әдістерді дамытуға жаңа серпін бермек. Ғалымдар ұсынған бұл модель болашақта қартаюға байланысты ауруларға қарсы емдеу әдістерін сынақтан өткізуде маңызды эталонға айналуы мүмкін.