Еуропалық комиссия интернет-пайдаланушыларды қорғауға арналған заң жобасын ұсынды

Еуропалық комиссия интернет-пайдаланушыларды қорғауға бағытталған Digital Fairness Act (DFA) атты жаңа заң жобасын жариялады. The Verge басылымының хабарлауынша, бұл құжат тұтынушылардың уақыты мен ақшасын жұмсауға итермелейтін тәжірибелерге шектеу қоюды көздейді.

Жаңа заң жобасы цифрлық кеңістіктегі бірқатар мәселелерді реттеуге бағытталған. Атап айтқанда, құжат аясында мынадай өзгерістер қарастырылған:

• Онлайн-ойындардағы лутбокстар мен виртуалды валюталарды реттеу;
• Тұтынушыларды шатастыратын бағалар мен жасырын инфлюенсерлік маркетингке тыйым салу;
• YouTube, TikTok және Meta сияқты платформалардың алгоритмдерін реттеу;
• Пайдаланушылардың белсенділігін арттыруға бағытталған ЖИ-агенттер мен DuoLingo тәрізді қосымшалардың хабарландыруларын бақылау.

Еуропалық комиссия өкілдерінің айтуынша, бұл ережелер бизнес арасындағы әділ бәсекелестікті қамтамасыз етіп, ЕО тұтынушыларына жылына 13,7 миллиард еуроға (15,1 миллиард доллар) дейін қаржы үнемдеуге мүмкіндік береді. Еурокомиссар Майкл МакГрат заң ережелерін айналып өтуге жол берілмейтінін атап өтті.

Дегенмен, бұл бастамаға қарсылық білдіргендер де бар. Кейбір ойын ұйымдары шектеулерді орындау мүмкін емес әрі негізсіз деп сынға алды.

Қазіргі уақытта Digital Fairness Act тек заң жобасы болып табылады. Ол күшіне ену үшін Еуропалық парламент пен Еуропалық одақ кеңесінің мақұлдауынан өтуі тиіс. Егер заң мақұлданса, талаптарды бұзған компанияларға жаһандық жылдық айналымының 6 пайызына дейін айыппұл салынуы мүмкін.