Cisco қаржылық есебін жариялап, ЖИ-инфрақұрылымы бойынша кіріс болжамын арттырды

Cisco Systems Inc. компаниясы өзінің бірінші тоқсандағы қаржылық есебін жариялап, Уолл-стрит сарапшыларының күткенінен де жоғары көрсеткіштерге қол жеткізді. Осыған байланысты желілік инфрақұрылым гиганты 2027 қаржы жылына арналған жасанды интеллект (ЖИ) инфрақұрылымынан түсетін кіріс болжамын қайта қарап, оны екі есеге арттырды.

SiliconANGLE хабарлауынша, компанияның есепті кезеңдегі түсімі өткен жылдың ұқсас кезеңімен салыстырғанда 24 пайызға өсіп, 18,5 млрд долларды құрады. Сала сарапшылары бұл көрсеткішті 18,1 млрд доллар деңгейінде болады деп болжаған еді. Ал таза пайда 2,9 млрд доллардан 4,6 млрд долларға дейін ұлғайды. Бір акцияға шаққандағы пайда 1,40 долларға жетіп, сарапшылар межелеген 1,33 доллардан асып түсті.

Cisco-ның Бас атқарушы директоры Chuck Robbins сарапшылармен кездесуде нарықтың көпжылдық желілік суперциклдің алғашқы кезеңінде тұрғанын атап өтті. Оның айтуынша, түрлі ұйымдар өзінің ЖИ жүйелерін кеңейту, қауіпсіздігін қамтамасыз ету және оңтайландыру үшін Cisco технологияларына жүгініп отыр. Қазіргі уақытта компания автономды ЖИ-агенттер жүйесін құруға және оларды кибершабуылдардан қорғауға арналған бағдарламалық жасақтамаларды да белсенді дамытуда.

Инфрақұрылымға сұраныс пен өсім болжамы

Компанияның Бас қаржы директоры Mark Patterson түсіндіргендей, Cisco тиімді операциялық мүмкіндіктерді арттыру арқылы пайда көлемін түсімнен де жылдам өсіруге жағдай жасады. Осыған орай, компания 2027 қаржы жылында ЖИ-инфрақұрылымынан түсетін кіріс болжамын 9 млрд долларға дейін көтерді. Бұл 2026 қаржы жылындағы көрсеткіштен екі еседен астам жоғары.

Дегенмен, чиптер мен жад компоненттерінің қымбаттауы себебінен компанияның жалпы маржасы өткен жылғы 68,1 пайыздан 65,6 пайызға төмендеді. Reuters мәліметінше, TECHnalysis Research сарапшысы Bob O’Donnell бұл төмендеудің инвесторлар үшін үлкен қауіп тудырмайтынын мәлімдеді. Сарапшының пікірінше, компоненттердің қымбаттауы жағдайында бұл қалыпты құбылыс, ал нарық үшін ең бастысы — компанияның кіріс көлемі мен жалпы қаржылық өсімі.

Қазіргі тоқсанда Cisco 18 млрд доллардан 18,2 млрд долларға дейінгі аралықта түсім түседі деп болжауда, бұл да сарапшылар саралаған 17,88 млрд долларлық межеден жоғары.