Agile Robots стартапы SoftBank басшылығымен 500 млн доллар инвестиция тартты

Германиялық жасанды интеллект (ЖИ) және робототехника бағытындағы Agile Robots стартапы 500 млн доллар инвестиция тартқанын жариялады. Sifted және Tech.eu мәліметінше, Series F инвестициялық раундына жапондық SoftBank корпорациясы жетекшілік етті.

Финансылық раундқа сондай-ақ Nvidia, Hitachi және T Capital компаниялары қатысты. Жаңа қаржыландырудың нәтижесінде компанияның нарықтық бағасы 8,5 млрд долларға жетті. Осылайша, ұйымның тартылған жалпы инвестиция көлемі 2 млрд долларға жуықтады. 2018 жылы Германия аэроғарыш орталығынан бөлініп шыққан стартап өнеркәсіптік роботтар мен оларды басқаруға арналған ЖИ модельдерін әзірлейді.

Өндірістік қуат пен технологиялар

SiliconANGLE хабарлауынша, компанияның өнім желісіне Diana 7 робот-манипуляторы және Agile One гуманоидты роботтар платформасы кіреді. Бұл құрылғылар зауыттар мен қоймалардағы ауыр физикалық жұмыстарды, сондай-ақ дәл құрастыру процестерін автоматтандыруға бағытталған.

• Agile One S: зертханалар мен әзірлеушілерге арналған ықшам үлгі;
• Agile One SN: Nvidia компаниясының Isaac GR00T ЖИ модельдерімен үйлесетін бес саусақты манипулятор.

Алдағы жоспарлар

Алынған қаражат АҚШ нарығына шығуға, инженерлерді жұмысқа қабылдауға және өндірісті ұлғайтуға бағытталмақ. Мюнхен маңында ашылған зауыт жылына 10 мыңға жуық робот шығаруға қауқарлы. Agile Robots бас директоры Dr. Zhaopeng Chen физикалық жасанды интеллект әлемдік өндіріс пен логистиканы түбегейлі өзгертетінін атап өтті.